L’Aula de les Metáfores de Grau, na Selmana de les Lletres Asturianes
La 40.ª edición va tar dedicada a la música n’asturianu y gallego-asturianu
El director xeneral de Planificación Llingüística y Normalización, Fernando Padilla, y la directora xeneral del Institutu Asturianu de la Muyer y Polítiques de Mocedá, Almudena Cueto.
Redacción/Grau
La 40.ª edición de la Selmana de les Lletres Asturianes va destacar el papel que la música cantada n’asturianu y en gallego-asturianu desempeña na normalización de dambes llingües. Del 26 d’abril al 9 de mayu, van desenvolvese actividaes de tou tipu repartíes per diez conceyos: talleres, esposiciones, homenaxes, presentaciones de llibros, llectures públiques, certámenes lliterarios, alcuentros escolares, entregues de premios, conciertos, representaciones teatrales…
La Selmana empieza’l vienres 26 d’abril, a les siete de la mañana, cola celebración del Alba de Les Lletres Asturianes na escuela de Llorgozana (Carreño). Esi mesmu día, a les ocho de la tarde, el Teatru Nuevu de La Felguera (Llangréu) va acoyer la gala del XI Premiu al Meyor Cantar, cola interpretación en directu de los cuatro cantares finalistes al cargu de la Banda de Gaitas El Trasno, Lafu y Rebeca, Los Berrones y Xaime Martínez, amás de l’actuación de Luis Núñez y los Folganzanes, ganadores de la edición anterior.
El sábadu 27 d’abril, a les 20:00 hores, una carpa instalada na Plaza Nueva de Ribeseya va acoyer el conciertu del grupu folk Corquiéu. Les actividaes centraes na música siguen el llunes 29, a les 18:00 hores nel teatru auditoriu de La Pola Siero, cola presentación del CD El mio cantar y conciertu colos cantares ganadores del premiu escolar del mesmu nome. Corquiéu, Guaja D, Llibre, L-R y Skontra van ser los encargaos d’interpretales en directu.
El martes 30, la Xunta Xeneral del Principáu va acoyer la yá tradicional llectura pública institucional de testos n’asturianu y gallego-asturianu. Esa mesma tarde, a les 19:30 hores, va celebrase, en collaboración cola Fundación Aula de les Metáfores de Grau, la entrega de los diplomes del VI Premiu de Poesía que se convoca pal alumnáu d’esi conceyu, amás de l’actuación musical de Toli Morilla.
El xueves 2 de mayu va presentase nel Muséu de Belles Artes d’Uviéu’l discu conmemorativu 40 años al son de la nuestra música/40 anos al son da nosa música, que se va regalar el vienres 3 de mayu, Día del Llibru Asturianu, en 56 puntos de distribución d’Asturies al mercar llibros y discos n’asturianu o en gallego-asturianu. Trátase d’una selección de 40 cantares que percuerren la historia de la música cantada nestes llingües.
El sábadu 4 de mayu va inaugurarase la VII Feria del Llibru y Discu n’asturianu, entamada col Conceyu d’Uviéu y l’Asociación de Llibreríes del Principáu d’Asturies. La Feria, instalada na Plaza de Trascorrales y que va tar abierta tamién el domingu, va cuntar con presentaciones de llibros, sesiones de cuentacuentos, conciertos y alcuentros lliterarios.
La postrera de les actividaes específicamente dedicada a la música ye’l conciertu d’ópera n’asturianu que’l claustru del Muséu Arqueolóxicu d’Asturies va acoyer el domingu 5 de mayu a les 12:30 hores. El tenor Pedro José González, el barítonu Juan Salvador Trupia, el pianista Mario Bernardo Fernández y el Coru de la Universidá d’Uviéu van interpretar una selección de pieces adaptaes al asturianu pol músicu y escritor Carlos Rubiera.
Nel programa de la Selmana hai tamién actividaes teatrales para los más pequeños, como’l martes 30 d’abril en Corvera, onde la compañía Higiénico Papel va representar la obra Hansel y Gretel, ganadora del II Premiu Nel Amaro de Teatru profesional en llingua asturiana y gallego-asturianu. El Teatru de Llaboral Ciudá de la Cultura de Xixón va acoyer la representación de les obres De qué color ye’l sol, de Kamante Teatru (miércoles 8), y Nunca nun se sabe, d’ Higiénico Papel (xueves 9). Per otra parte, nel teatru Armando Palacio Valdés d’Avilés van entregase los premios del VI Certame de Teatru Escolar y van representase dalgunes de les obres ganadores.
El vienres, 3 de mayu, el colexu públicu Lorenzo Novo Mier d’Uviéu va ser l’escenariu del actu escolar institucional de celebración de la Selmana de Les Lletres cola entrega de los premios de los certámenes artísticos y lliterarios.
El gallego-asturianu va tar presente nel Auditoriu de Tapia, el sábadu 4 de mayu, a les 19.00 hores, col Homenaxe ás nosas lletras, que nesta ocasión protagoniza’l grupu de rock Bacotexo, cola presentación en conciertu del so últimu discu, Mar.
Otra actividá na Sala Borrón d’Uviéu: la cuarta edición d’Entaína a escribir, concursu de microrrelatos improvisaos n’asturianu pa mocedá que se convoca en collaboración col Institutu Asturianu de la Muyer y Polítiques de Mocedá.
