Publicado el: 18 Nov 2019

Carta a Samartín

Por Rosa RODRÍGUEZ

Presidenta de la Asociación Cultural ‘La Piedriquina’ y cronista oficial de Las Regueras

Muy queríu santín, patrón de nós: Una vegada más venimos a festexate y ya van 25 años y 22 que te escarabayo estes llinies pa que sepas comu nos va. Pos yá ves, güei tamos de folixa gracies a La Piedriquina que ye quien punxo en valor la to fiestina y damos gracies per ello y per tola xente que al su rodio collaboró en tantes coses.

L’añu pasáu cellebramos la Navidá con un concierto villancicos del coru Les Regueres. ¡Qué guapu tuvo! Y con una chocolatada na escuela. Allegó abonda xente, señal de que empresta esfrutar colos vecinus. Y repitimos el xuegu del amigo invisible y dimos esi día un detallín a los que nos tocaron. Pero tú ya sabes que esto faise no pel detallín, que presta también, sinon pol compromiso de curiar per l’amigu tol añu. Asperamos que esta vegada s’apunte dalguno más.

A la fin del iviernu un grupu de persones decidieron xuntase para consiguir que s’escavara’l mosaicu La Estaca. Crearon l’asociación Amigos de la Villa Romana de San Martín de La Estaca y nel branu punxeron en marcha una campaña de mecenazgu, na que con pequeñes aportaciones consiguieron lo preciso pa esta domina. Foi la meyor publicidá pa esti conceyu. Agora ya sabe tol mundo ónde ta La Estaca y Les Regueres. Un movimientu ensin precedentes, que llegó a tola xente que i interesa la cultura con sofitos y donaciones dende Australia, Cincinnati, Los Ánxeles, L’Habana, Arxentina, Costa Rica, Luxemburgu, Alemaña, Francia y de toa España. Lo que val creer nun proyectu y lluchar por sacalo alantre. Y esto ye bien d’estimar, santín perque va ser abondu bonu pa este conceyu, p’Asturies y pal patrimoniu. Samartín, ya que ye onde vienol’el to nome per primer vegada a Les Regueres, fai daqué pa que pueda siguise afayando esta maravía, que toos xuntos sumemos. Que se declare bien de interés cultural, que comu tu bien sábeslo, tamos ante una de les villes mas perimportantes nun solu d’Asturies sinon de tol norte. Asina que pedimoste ayuda, santín.

Allumamos l’Anuariu numbero 12 y presentamoslo n’Oviéu, Llanera y Grau.

Na primavera llaborose la primer cerveza afincada en Parades 34: la Turbia, de Cerveza Indiano, puntuada con valoraciones peraltes por entendíos de la bébora como una de les meyores cerveces artesanes d’España d’esti 2019. Yá sabes tú qué d’esta parroquia sal lo meyor… Pena que Carlos y la so familia camudárense y yá non vaya a haber más llotes d’equí. Agora quedó la casa vacida, como tamién la de Rosal en Mariñes. A cambéu vinieron dos families a vivir en Xugal dende va unos meses, la de Silvia y el so fíu Pablo y la d’Isabel y David. Y en Parades Jovino y Mari Sol. Mira per toos ellos, santín. Tamos percontentos perque agora mesmo hay 8 neños de la parroquia que van al Colexio Santuyanu: Carmen, Inés y Fran de Parades, Carlos, Antonio y Jaime de Xugal y Noé y Hugo de Mariñes. Échanos un gabitu pa que venga xente nuevu a vivir al pueblu, que si non vamos quedar solus. Que seya xente, que non plagues, que ya tamos fartucos cola velutina que hay que pone-i trampes pa que non termine coles abeyes, que sin abeyes sería finar con too.

Esti añu nun hubo nacencies; casóse Guzmán con Noelia y cellebraron les sus bodes de oru Gelinos y Pepe. Mira per ellos, santín.

Pal Corpus fiximos un mercadin bien curioso, llastima que lloviera con ganes de primeres pero depués paró y pudimos mercar y tomar un vermú na plaza antes de dir pa la escuela onde nos xuntamos pa comer, cantar y baillar más de 70 persones. Va haber que repitilo.

Vinieron otra vegada más dos guapes neñes saharagüis a casa de Clara y Ramón de Mariñes. Damos-yos les gracies per ello.

Vicente Suárez, el nuestru guía favoritu del patrimoniu militar participó esti branu en el 75 aniversariu del desembarcu de Normandía y punxo en marcha la asociación pa la Recuperación del Patrimoniu de la guerra del Pasiellu de Grau.

En Mariñes cellebraron la Conceción, comu siempre gracies a Manolo Pachu, y los Mártires, que dio-i por llover enforma y fadió un pocoñin el pinchéu y el falar cola xente, que vienu igual a la prestosa misa. Fiximos la fiesta’l Cristu con rameres, pero nun puxó naide y vieno abondu xente de fora, tuvimos una misa perguapa con Fonsu Les Regueres y familia y colos Regueranos 2019, que esti añu foron trés: Judith Naves Morán, emprendeora exemplar y les comisiones de fiestes de Premoñu y de Santuyanu, había que premiar l’esfuerzu de lus que trabayen de baldre.  Hubo vermú y aperitivu y sortéu de cestes que donaron dellos vecinos, sobremanera de Parades y pasamoslo perbien.

Fonsu Les Regueres algamó en Mieres el premiu al meyor gaiteru acompañante de tonada.

Na Piedriquina entamaron otra Seronda Cultural con bon esito de participantes y de muncho aprender.

Belén de Cal Pichu de Mariñes donó al Muséu del Pueblu d’Asturies una antigua picadora de forraxe que podrá ser almirada poles xeneraciones vinientes. Una bona idea, si nun vase usar, siempre pue donase a esti Muséu.

Dispidimos a unos cuantos vecinus a los qu’apreciábamos: Luis de Güeyo, Marcelo Feliciano, Elvira Cuervo, Arxentina Pachu,  Estela de La Coroña, Lluis de Pinón, Manolo Sidro, Alfredo Bernaldo, Vírxenes de Parades, Enedina Nonito, José Cutilda y Marité Canor. Damos les gracies por habelus conociu y queríu, asperamos ten a la tu vera que tú siempre curies de los tuyos.

Paez que tamos de norabona col arreglu de la carretera de Escampleru a La Granda que ceo va comencipiar. ¡Falta fai abondu! Yera un deseu llargamente esperau.

Esti añu nu nos trayiste el tu veranín… dicen que ye el cambio climático que nun entiende de refranes. Más malo d’entender que lo del tiempu ye el gobierno, que tres vegaes votamos yá esti añu y gastaron munchos cuartos que facín falta pa otres cueses.

Güenu, esto ye lu que pasó al nuestru entender. Pedimoste polos que tan malos, polos que tan solos… perque nus llevemos toos bien, que no haya entrugues baldíes que esmolecen y nun lleven a nengún sitiu y perque al añu venideru temos toos equí otra vez, que trabayemos pel pueblo y que nun se acabe lo que tenemos.

Gracies per too. Sabes tolo que te queremos, patrón de nós dende fai más de milenta y taitantos añus. Un carrao de abrazus y güei, que ye un día especial, dexame date en nome de toos un beso muy, muy grande. Hasta tolos díes, Samartín.

Deje su comentario

Diario digital del Camín Real de la Mesa