El oxetivo ye fomentar la creatividá ya la expresión lliteraria ya da-y prestixu a la nuesa llingua ya la cultura asturiana
El primer concursu de relatos curtíos convocáu pola Conceyalía de Cultura del Ayuntamientu Candamu naz colos oxetivos de fomentar la creatividá ya la expresión lliteraria pa contribuir a desarrollar el conteníu cultural de la sociedá y esparder, consolidar, enriquecer ya da-y prestixu a la nuesa llingua ya la cultura asturiana.
En I Concursu de Relatos Curtios establécense 2 categorías:
Adultos. Podrán participar tolas personas mayores de 16 años, presentando una obra namái, escrita n’asturianu normativu ou na variante occidental, na que Candamu s’afita.
Premiarase la obra inédita qu’a xuiciu del xuráu sía d’un valir lliterariu mayor. La temática ía llibre ya’l relatu ha tener una extensión de 5 fueyas como mínimu ya 20 como máximu.
Concederase un premiu de 500 € al trabayu ganador d’esta primer categoría, tea escritu n’asturianu estándar ou na variante occidental. El xuráu podrá conceder los accésits qu’estime oportunu.
A estas gratificaciones económicas ha efectuáse-ys la retención correspondiente, en conceptu de tributos al Estáu.
Escolinos/as. Esta categoría ta dirixida a los escolinos de llingua asturiana hasta 16 años, au s’establez una subdivisión ente nenos hasta 12 años por un llau, onde se concederá un premiu consistente en un lote de llibros, CD’s ya DVD’s, ya de 12 a 16 por outru, estableciéndose outru premiu tamién consistente en material escolar.
Plazu presentación
Las obras han presentase por duplicáu n’Ayuntamientu Candamu (Barriu El Campu, núm 27, 33829 Grullos, Candamu) de manera presencial ou por corréu certificáu na mesma dirección, nun sobre baxo pseudónimu, qu’axunte dientro la plica na que se dean a conocer los datos riales del autor/a: nome ya apellíos, DNI ou númberu de tarxeta residencia, fecha de nacencia, dirección completa, teléfonu de contactu, dirección de corréu ellectrónicu. Los participantes menores d’edá deberán indicar tamién nome, apellíos ya DNI del sou representante/tutor llegal.
Las obras han presentase primeiro del vienres, 12 frebeiru de 2016.
Xuráu
Los premios del Certame fallaralos, atendiendo a la sou orixinalidá, redacción ya calidá lliteraria, un xuráu formáu por escritores ou docentes de llingua asturiana. El sou fallu nun se podrá retrucar.
El resultáu del concursu fairáse públicu’l día 4 de marzu de 2.016, al traviés del web del ayuntamientu, intre nel cual darase a conocer el llugar, fecha ya hora de la entrega premios. L’ayuntamientu va comunicar el fallu a los premiaos.
Los trabayos presentaos van quedar en poder del Ayuntamientu Candamu, que los podrá publicar se lo estima oportunu.
Los participantes nel Certame dan por bonas estas bases.
Deja un comentario