Yá buenavá, siendo yo neñu, cuntábase la historia d’un grupucu de música que fuera una vez a la romería Pintoria y del que dicíen que tenía un repertoriu musical tan curtiu como lo andaba de cuartos la sociedá de festexos que los contratara. Tan curtiu yera, cuntaben, que limitábase a un solu cantar. Y cuando acababen de cantalu, entamaben otra vuelta, diciendo, una y otra vez, «¡y agora la mesma, pero con más bombu!»…
Y viénome esti día a la cabeza’l cuentu esti por mor de dellos asocedíos que volvió protagonizar por enésima vez la Santa Trinidá de los Anti: Ma, Fíu y Espíritu Santu, xunto cola Corte Celestial qu’anda al rabu d’ellos, cola Gracia l’Espíritu a la cabeza, y delles otres potestaes buenes y santucos menores…
La historia ye más o menos asina: el Fíu, nun actu d’una pública universidá, subvencionáu con cuartos públicos, impide qu’una poeta llea un poema nuna llingua al paecer demoniaca, propia de les sumidaes más escures de Satanás, alegando qu’ello ye un insultu al Espíritu Santu nel so empireu existir y deleitase. Darréu, emburriáu pola caldia’l momentu, diélden-y los fumos y, poseíu dafechu pol Santu Espíritu de so pá, fai pública una nota d’opinión na que remana palabres propies del estilu sublime col que canten los ánxeles en cielu, como «puta», «mentira» y «paletos», ente otres, manexaes con una sutilidá cola que tan solo un home cultu y de rellumón ye quien pa ello. Aconséya-y entós la Corte Celestial en plenu que pida disculpes (nun vaya perder la plaza qu’ocupa), y pídeles, n’efectu, públicamente. Pero son falses disculpes, un sí pero non, y tol mundu lo sabe… A los dos díes anda como alma en pena arrancando peles paredes papeles escritos naquella llingua del demoniu y dando glayíes como alloriáu, pidiendo, más entá, desixendo, que se retire darréu tolo que tea escrito nesa llingua cayida en desgracia por obra del Espíritu…
La Gracia l’Espíritu (culta esta sí, pero sustancialmente equivocada), fai-y darréu de coriquín, amiyando sobre toos nosotros, como siempre lo fai, al mou de rociada de purificación, de catarsis contra los impuros demonios. Otra potestá celeste, poderosa tamién, y buena, adaliz de la pureza patria, entámala a continuación col increíble orixe del espíritu de la nación española en tiempos del Reinu d’Asturies o, meyor, del Paraísu Terrenal o ¡qué coimes, por qué quedar curtiu! del mesmu Big Bang. Too mui espiritual… Finalmente, otros munchos santucos, de los que nun merez la pena falar, aprovechen el casu pa ganar el so sitiu en Paraísu, al ablugu de les altes autoridaes del Cielu, tremando l’universu de testos absurdos, que nun almiten una mínima crítica científica, y que nun merecen, darréu d’ello, l’esfuerzu de lleelos…
En fin, más de lo mesmo en tou casu. Curtiu’l repertoriu de toos ellos, que yá naide oxetivu con una mínima formación llingüística ye pa creer. La mesma hestoria de siempre, los mesmos mocinos, les mesmes falacies… Pero, eso sí, agora, como dixi, con más bombu… El bombu de les bocayaes, l’insultu y les indignes salíes de tonu, aquelles que tienen la virtú de que, cuando se faen públiques, dexen a caún nel so sitiu, que nun ye otru que’l que merez…
El equipo trubieco llama a las familias de niños y niñas nacidos en 2011 y…
La Asociación Frente del Nalón y el Ayuntamiento recrearán la muerte de la joven en…
La villa moscona, Capital Europea del Deporte 2024, acogerá del 11 al 14 de septiembre…
La comunidad autónoma de Asturias, en el norte de España, ha puesto en marcha una…
En el mundo de las apuestas, maximizar las ganancias no es solo cuestión de suerte,…