Candamu convoca la tercera edición del sou Concursu de Relatos Curtius «Conceyu Candamu»

Tien como oxetivos fomentar la creatividá ya la espresión lliteraria ya da-y prestixu a la llingua asturiana

Redaición/Grao

El Conceyu de Candamu ta acabante de convocar la tercera edición del certame lliterariu que lleva por nome Concursu de Relatos Curtios «Conceyu Candamu». Las bases del mesmu, los plazos de presentación de las obras ya la fecha del fallu del xuráu van poder consultase na páxina del Conceyu (https://goo.gl/pP1NDM).

Nesta tercera edición del concursu de relatos curtios convocáu pola Conceyalía de Cultura del Conceyu de Candamu tien como oxetivos fomentar la creatividá ya la espresión lliteraria pa contribuir a desarrollar el conteníu cultural de la sociedá ya esparder, consolidar, enriquecer ya da-y prestixu a la llingua asturiana.
Nel concursu establécense dous categorías: una, onde van poder participar tolas personas mayores de 16 años presentando una obra namái ya escrita n’asturianu estándar ou na variedá occidental, ya outra, onde van poder presentase rapaces ya rapazas hasta los 16 años. Esta segunda categoría va tar subdividida en tamién en dous: por un llau, con una sección pa rapaceríu d’hasta 12 años ya con outra de neños ya neñas d’ente 12 ya 16 años.
Van premiase las obras inéditas qu’a xuiciu del xuráu sean d’un valor lliterariu mayor ya la entrega de premios va faese coincidir cola celebración de la Semana de las Lletras Asturianas del mes de mayu de 2018. Pa la categoría d’adultos establezse un primer premiu de 500 euros ya un segundu de 200 euros, anque’l xuráu va poder conceder los áccesits que crea oportunos. La temática yá llibre ya’l relatu ha tener una estensión de cinco fueyas como mínimu ya de venti como máximu. Por outra parte, na categoría infantil los premios van consistir en dellos llotes de llibros ya discos n’asturianu ya nun hai mínimu nin máximu de fueyas.

Las obras han presentase antes del vienres 16 de marzu de 2018 por cuadriplicáu nel Conceyu de Candamu (Barriu El Campu, númeru 27, 33829 Grullos, Candamu) de manera presencial ou por corréu certificáu na mesma dirección nun sobre baxo seudónimu, qu’axunte dientro la plica na que se dean a conocer los datos riales del autor/a: nome ya apellíos, DNI ou númeru de tarxeta de residencia, fecha de nacencia, dirección completa, teléfonu de contactu ya dirección de corréu electrónicu. Los participantes menores d’edá deberán indicar tamién nome, apellíos ya DNI del sou representante/tutor llegal.

Na pasada edición el primer premiu d’adultos foi p’Ana Esther Martínez Sierra ya’l segundu, pa Yose Álvarez Mesa. El primer premiu de la categoría infantil foi ex aequo pa Nora Dos Santos Fernández ya pa Pelayo Cardo Gil ya Jorge López Castro. Nesti tercer concursu’l Conceyu de Candamu esperar superar el volume de participación de las anteriores ediciones ya cunta con enganchar ya animar a la xente del propiu conceyu a que presente los sous relatos.