Los espertos Xosé Ambas y Ramsés Ilesies van guiar esta xera cultural pela fastera sur del conceyu el 6 de setiembre, que esi mes va tener continuidá con un recital poéticu na villa

Redacción / Grau

El Serviciu de Normalización Llingüística del conceyu de Grau organiza les xornaes «Asturianu en branu». D’esta mena, el día 6 de setiembre a les 16 hores va facese una ruta etnográfica en coche que va salir de la Casa la Cultura de Grau. D’esta vuelta va organizase una pequeña caravana de coches que va recorrer la parte sur del conceyu moscón, pela fastera de Salceo, con delles paraes culturamente importantes, guiaos per Xosé Ambás y Ramsés Ilesies mediante esplicaciones etnográficas (llingüísticas, paisaxísticas, históricas, sociales, musicales ya arquitectónicas). Por ello llimítase’l númeru de xente que pue participar na actividá a 20 personas, poniendo un plazu d’inscripción por teléfonu d’una semana. Les reserves puen efectuase llamando al 985 952 229, los martes ya miércoles de 9 a 14 hores. El preciu ye de baldre.

Esta propuesta cultural ñaz al rodiu de la petición de les presones qu’asistieron a los cursos d’asturianu que se fixeron nel conceyu nos anteriores meses , ya del interés pola cultura asturiana de los moscones qu’asisten de manera regular a los eventos organizaos dende l’área de Cultura de Grau. La primer cita foi’l día 12 de xuliu ya l’encargáu d’abrir el programa foi Xandru González Fernández, cocineiru de la Escuela Pública Bernardo Gurdiel, que falóu de la influyencia del Mercáu de Grau nel queisu d’afuega’l pitu. La prósima cita braniega va ser a mediaos de setiembre ya va centrase nun recital poéticu peles cais de Grau. Estes xornaes son de baldre y tán dirixies a la población en xeneral pel so carácter divulgativu. El Serviciu de Normalización Llingüística de Grau, con estes actividaes de branu, sigue’l camín d’eventos qu’empezóu hai unos meses nel conceyu ya márcase l’oxetivu de siguir funcionando próximamente.