Tando hai años nuna romería, siendo yo un mocín, un amigu míu averóse a la barra acabante llegar y pidió una botella vinu. «¿De qué marca?», preguntó-y el paisanu. Y contestó-y el mio amigu: «De lo más perrero que tenga; total, ye pa enfilame…». Y vienme a la cabeza esto agora porque cuido que, en campaña electoral, munchos políticos aseméyense enforma al mio amigu. Nun-ys da más la ‘marca’, esto ye, la calidá, la veracidá, la honradez de lo que dicen… Y nun-ys da más porque’l so oxetivu ye d’ordepráuticu: ‘enfilar’ a los votantes col envís de que los voten, esto ye, envizcalos coles artes del engañu… Lo que-ys dicen ye, a cencielles, aquello que Hegel dixo que yera’l rasgu esencial de los héroes: dicir a la xente lo que la xente quier sentir… Pero los políticos nun son héroes; solo xueguen a selo. Y munches vegaes nun son más qu’una mena de villanos. Y por eso, per detrás de l’aparente seguridá cola que falen, les más de les veces, nun s’atopa otro qu’un vacíu fondu y una falta de coherencia que sería d’escándalu en cualquier otra profesión.
Los políticos xueguen a clasificar a la xente en conxuntos. Y miren darréu ónde s’atopa la presa más numberosa. Y dempués echen la fría cuenta de lo que-ys convién, preguntándose: ¿qué ye lo que-ys presta a estos que diga pa poder ganalos? ¿Cuántos d’aquellos otros pierdo si lo digo? Y si-ys trai cuenta son capaces non solo a dicir, por exemplu, que la tierra ye plana, si nón mesmamente a dicilo ensin despeinase. O, puestu’l casu, pueden llegar a afirmar, por exemplu, que l’asturianu nun esiste, o que s’inventó nun llaboratoriu. Y si ye menester, amestena ello los insultos que-ys abulten afayadizos, dalgunos d’ellos mui guapos y ocurrentes y de munchu nivel, como por exemplu, «jauría» de perros o gandaya d’estrema izquierda.
¿Que too ello ye mentira evidente? ¿Que nun resiste’l menor análisis? ¿Que los insultos nun son aceutables enxamás? Ciertamente. Pero, en realidá, ¿qué más-ys da? Lo que-ys importa ye qu’estos tantos de más menos aquellos cuantos de menos faen, en resultes, una bona brañada votantes. Y por eso solo,yá-ys merez la pena faelo…Pero, preguntaréisvos, ¿y l’honor? ¿Aú queda?Pues dellos gástenlu del más perreru, claro. Total; ye pa enfilanos…
El Pleno de Grado aprobó ayer por unanimidad la suspensión de licencias para la instalación…
La compañía ferroviaria eliminará graffitis, pintará y reparará las marquesinas de 25 apeaderos en Asturias…
El Gobierno del Principado destina 1.402.555 euros a labores de desbroce de pastizales en 48…
Diego Barreiro consiguió su sueño, ser campeón de Asturias de boxeo amateur en su categoría.…
Un equipo internacional en el campo de Quintana, en Trubia. La selección masculina de Omán…
Jugar al disc golf este verano a la vera del río Cubia es más fácil…