Paz G. Mesa, Muyer del Añu de Les Regueres: «Siempre tuvi interés pola mio cultura»

«Decidí aplicar los conocimientos de les xeneraciones anteriores a tolos aspeutos de la casa, alimentación, hixene, animales etc., asina al llegar a Les Regueres entamamos a cultivar la mayor parte de lo que comemos»

Esther Martínez/Les Regueres

Paz González Mesa, Muyer del Añu del Conceyu de Les Regueres, nacéu, en 1971 en Les Caldes (Uvieu), pueblu nel que foi “perfeliz, a pesar de que cuando tenía siete años morrió mio pá, daqué determinante pa la mio vida, y que fexo que la mio crianza por mandatu de la vida-y correspondiera a mio ma, asina que’l mio referente de siempres foi mio ma.”, diz Paz González.

Estudió na Universidá d’Uviéu; ye diplomada en Ciencies Empresariales, y  trabayó na empresa privada casi diez años, y dempués na alministración, primeramente nel Principáu y anguaño na Universidád d’Uvieu.

Siempre tuvo claro que quería vivir nun pueblu, y dende 2000 lleva viviendo en Puerma, na parroquia de Valdunu.

“De siempres tuvi interés pola mio cultura y les nueses tradiciones, de les que mio ma ocupábase de falame y contame bien de coses pa que me quedare bien claro de ónde venía, asina que de chavalina quixe entamar a tocar la gaita, y a averame a la música y el folclore asturianu, tocando en delles bandes de gaites y formando parte del coleutivu Andecha Folclor d’Uviéu dende va más de 25 años.

La cultura nun ye un fechu estremao de les otres xeres de la vida y por ello decidí aplicar los conocimientos de les xeneraciones anteriores a tolos aspeutos de la casa, alimentación, hixene, animales etc., asina al llegar a Les Regueres entamamos a cultivar la mayor parte de lo que comemos, a facer quesos, manteiga, sidra, vinagre, conserves y al dir faciendo todo esto el resultáu bono diba pidiéndonos que ficiéramos muncho más como: ropa, xabones, droguería doméstica. El facer les coses por ti mesma da trabayu pero date muncha satisfación y una bien grande foi la del pan.”, asegura la homenaxeada.

Paz y la su pareya, Xandru Fernández, semen escanda, amasen el pan, tienen pites y oveyes xaldes, de les que Paz, aprovecha la llana pa trabayala en un telar centenariu, que pa ella ye una ayalga. Ye perbona texedora y fai los tintes con hierbes, fruta y semilles naturales. En 2018, la pareya fue ganadora del Día del Traxe en Grau.

Anguaño ta formándose en teoría del color col pintor y artista asturianu Toño Velasco, asina y trabayando a “tiempu parcial” na artesanía textil dende va 8 años.” La formación en cualisquier oficiu ye fundamental y tien de ser llarga, antiguamente lo oficiales taben formándose durante años pa poder llegar a ser buenos profesionales, y yo entiendo qu’esi ye’el camín, porque un mal trabayu non solo te desacredita a ti como profesional sinón a tol sector.

Esto fexo qu’entamare a pensar en clave de sostenibilidá, demientres se tira la llana, mercamos chaquetes de poliéster, una gran contradición y un gran perxuiciu pal planeta, tenemos de ser egoístes con nosotros mesmos pero a nivel comunitariu, curiando el mediu y con un consumu responsable. Un consumu responsable ye cuando teo que mercar daqué, facelo pensando en quien va recibir eses perres, si van dir pa un empresariu qu’esplota a les trabayadores y pa enriba tributa fuera, o van dir pa una autónoma o artesana que con tantu esfuerciu saca alantre el so proyeutu de vida y tributa eiquí y tamién como tan feches les coses, si contaminando y derrochando recursos o a la contra aprovechándolos y mirando pal futuru.”

 

Esta ye la  su propuesta de vida na que  engloba a Xandru, la casa, los sus animales, les sus vecines, el su pueblu, y el su conceyu; una propuesta comunitaria de mirar pa atrás y p’alantre al mesmu tiempu implicándo na xera a tolos que la arrodien.