Tola fuerza ya tol apoyu a la residencia pública de Grau

Xosé Antón AMBÁS

Taréis viendo nos medios la terrible situación pola que tán pasando los mious paisanos ya las mious paisanas de la RESIDENCIA PÚBLICA (ERA) del conceyu Grau.
A tola xente se nos encuéi’l corazón de pensar lo mal que lo tán pasando internos, internas, trabayadoras ya trabayadores d’esti centru ya muchos tenemos allí amigas, amigos, parientes ya parientas d’esta contornada.
You séi bien cómu funciona esti llugar ya nun puedo dicir más que cousas bonas d’una residencia que pa mí yá modelu a siguir pola bona xestión ya’l bon faer del sou director ya de tolos trabayadores ya tolas trabayadoras.
Cuantayá que pongo d’exemplu a esti llugar polas actividades que de contino entama dando una vida a los nuesos ya las nuesas mayores que los fai tar al más altu nivel de los cuidaos biopsicosociales.
Nesti centru cuidanon a miou tía, que yá falta, ya a tantos amigos ya amigas que séi mui bien de lo que tou falando. Nesti centru sigue una de las personas más importantes de la miou vida de recopilador: PEPA CA TRILLIVALLE DE LAS MURIAS.
Pepa foi d’esas muyeres que me marcanon a mí ya a bona parte d’esti pueblu asturianu, Pepa yá un iconu de la nuesa cultura tradicional ya con 97 años sigue ente algodones colos cuidaos d’esta residencia pública ya l’amor de los sous familiares.
Nel 2016 fixímos-y un homenaxe ente parientes, parientas, amigas ya amigos, ya d’esi día yá esta semeya.
FUERZA PA ELLA YA PA TOLOS YA TOLAS RESIDENTES, FUERZA PA TOLAS YA TOLOS TRABAYADORES YA UN ABRAZU APERTÁU PA CARLOS, UN DIRECTOR QUE TRABAYA COMO NAIDE COLOS NUESOS YA PA LOS DE NUESO.