La Casa Cultura va a acoyer hoy un coloquiu col artista asturianu, centráu na figura de Rambal
Redacción/Grau
La Casa Cultura de Grau va acoyer hoy, 14 d’avientu, un alcuentru col artista asturianu Rodrigo Cuevas. L’actividá, que forma parte de la programación navidiega d’Grau, enmárcase nel circuitu artístico-lliterariu Autores nel Camín 2021, cola collaboración ente’l Gobiernu d’Asturies y el Conceyu moscón.
L’alcuentru con Rodrigo Cuevas (19,30 h.) nun va tener formatu d’actuación musical, sinón de charra o coloquiu centráu na figura de Rambal, personaxe al que Cuevas fai un homenaxe nel so cantar Rambalín. Esti tema gallardonáronlu col Premiu Camaretá al meyor cantar na edición de 2020. Depués del alcuentru, Rodrigo Cuevas va interpretar la pieza.
El Circuitu Autores nel camín pon en contactu al públicu asturiano colos/coles autores ganadores de los premios convocaos pola Conseyería de Cultura, Política Llingüística y Turismu al traviés d’alcuentros, recitales o talleres lliterarios.
Rodrigo Cuevas (Oviedo/Uviéu, 1985) tien una trayectoria d’un prestixu bien reconocíu na música y nes artes escéniques asturianes y nacionales. A lo llargo de 2020, esti cantante, compositor, instrumentista y axitador folclóricu ta representando por tol país l’espectáculu Trópico de Covadonga. Cuevas llanzó al mercáu en 2020 l’álbum Manual de cortejo, que foi mui bien recibíu pola crítica y pol públicu.
Deja un comentario