El quirosán Andrés Fernández, premiu ‘Enriqueta González Rubín’

L’autor, de 19 años, rellata una ucronía ambientada nel sieglu XIX y primeros del XX onde Asturies s’atopa sometida al Reinu Uníu y llucha por lliberase

Redacción/ Grau

Andrés Fernández Menéndez, de raigaños quirosanos, ye’l ganador de la segunda edición del premiu ‘Enriqueta González Rubín’ de Narrativa moza n’asturianu, que promueve la Conseyería de Cultura, Política Llingüística y Turismu. La so novela ‘1929’ reconocióse pol xuráu del gallardón porque “escrita dende un enfoque interseccional, usa con aciertu les ferramientes  narratives, manexando con oficiu les distintes perspectives temporales y definiendo bien a los distintos narradores”.

Esti escritor mozu construye un rellatu ucrónicu, reconstruyendo con lóxica acontecimientos históricos que nun asocedieron, y describe una Asturies qu’a lo llargo del sieglu XIX ta sometida al xugu del Reinu Uníu y vive una revolución lliberadora a primeros del sieglu XX.

El premiu ‘Enriqueta González Rubín’ de Narrativa moza n’asturianu ta dotáu con 3.000 euros. El Gobiernu d’Asturies impulsó’l gallardón nuevu nel 2021 pa reconocer el talentu de la producción lliteraria de les voces nueves de la lliteratura en llingua asturiana. Na primer edición recayó na escritora Blanca Fernández Quintana.

Andrés Fernández Menéndez naz n’Argame (Morcín) nel 2003, de familia quirosán, y cursa’l grau d’Estudios Clásicos y Románicos na Universidá d’Uviéu. Ye autor de la novela ‘1809: cartes de la revolución de Trubia’ (Ediciones Radagast, 2022), amás de dellos rellatos como “El Cantar de Suaro Caínez”, col que ganó’l IV Concursu de rellatos de Morcín en categoría xuvenil.