Ástura organiza en el Atenéu Obreru de Xixón una conferencia sobre el economista, a cargu de David Rivas

Redacción / Grau

Ástura organiza una conferencia sobre Flórez Estrada: economista, patriota, revolucionariu y profesor d’Oxford, a cargu de David M. Rivas Infante, mañana martes, 14 de febreru, a les 19H.00’, nel llocal social del Atenéu Obreru de Xixón (Cai Francisco Tomás y Valiente, 1-2ª Planta)  Esta actividá ye una collaboración ente les entidaes del Atenéu Obreru de Xixón y de Ástura, pa facer una actividá mensual en torno a la promoción de la cultura asturiana.

Álvaro Flórez Estrada (Somiedu, 1766). Gran economista de la illustración asturiana, reconocíu como tal por John Stuart Mill. La so visión de la desamortización, por exemplu, ye d’una orixinalidá sorprendente, por cuanto defende la propiedá comunal de la tierra compatible con un usu priváu, inspirándose pa ello nos usos tradicionales asturianos. El so “Cursu d’economía política” –testu básicu de la moderna ciencia económica concebíu como un tratáu completu d’economía. la so hestoria y les lleis que la regulen dende la producción al consumu– escribiólu nel exiliu de Londres y revisólu en siete ediciones socesives dende 1828 a 1852, versión esta qu’editó Trea arriquecida con notes y testos mui interesantes en 2010. Pola so estensión y l’actualidá de les idees qu’atropa, la obra ye un finxu importante nel desenvolvimientu de la economía política. Fuera la figura pública más importante del 25 de mayu de 1808 cuando, con 42 años, presidía la Xunta Suprema d’Asturies que proclamó la so soberanía, declaró la guerra a Francia, unvió embaxadores al Reinu Xuníu y reclutó un exércitu. Diputáu por Asturies nes cortes de Cádiz nun participó na redaición de la constitución, que quedó privada de les sos opiniones favorables al sufraxu universal, la reforma del modelu colonial, la separación ilesia-estáu, la disolución de la inquisición…, too ello conforme a un pensamientu lliberal cercanu al republicanismu. Foi condergáu a muerte por Fernando VII, y yera un lliberal radical, anglófilu y francmasón, que viviera l’exiliu en Londres, impartiendo docencia na Universidá d’Oxford.  En 1820 sofitó’l pronunciamientu de Riego dende’l so exiliu inglés. Proclamada la Constitución, tornó a España. Intentó poner en práutica dalgunos de los sos planes económicos ya industriales y foi elexíu diputáu a Cortes por Asturies. Pero la invasión de los Cienmil Fíos de San Lluis de 1823 obligólu a exiliase otra vegada a Londres per 10 años. Morrió en Noreña en 1853, siendo senador vitaliciu por Asturies.

David M. Rivas Infante (Xixón, avientu de 1957) ye Doctor n’Economía. Tamién cursó los doctoraos de socioloxía y antropoloxía en Salamanca y Madrid. Recién xubiláu como Profesor Titular d’Estructura Económica na Universidá Autónoma de Madrid, trabayó n’equipos d’investigación nuna docena d’universidaes d’Europa y América. Aparte la so vida dedicada a la docencia y l’análisis económicu, foi siempre mui activu nos campos de la cultura, el desenvolvimientu caltenible, el mediuambiente y la política, donde siempres amosó un ñidiu perfil europeísta dende la so fonda identidá nacional asturiana. Ye miembru de l’Academia de la Llingua Asturiana dende 1993. Tien publicada cuasique una trentena llibros y participó, amás, nunes cincuenta obres coleutives. Fuera Premiu Arbidel de lliteratura erótica. Anguaño ye columnista del selmanario “El Fielato” y contertuliu habitual de “Les Fartures” y “La Buena Tarde” de la radio pública asturiana. Lleva na rede’l blogue “Omnia mutantur, nihil interit”.