La Flor de Grau texe

La nueva asociación organizó un taller de texíu de medies pa gastar col traxe’l país, guaiáu pola artesana y texedora Paz Mesa

Marta Canteli/ Grau

La nueva asociación La Flor de Grau organizó un taller de texíu de medies pa gastar col traxe’l  país. Los díes ocho y quince de febreru, l’Asociación de Folclore La Flor de Grau organizó un taller de texíu de medies pa vistir col traxe asturianu. Foi guiáu pola artesana ya texedora Paz Mesa nel mesmu llocal onde semanalmente pon clas de baille y pandereta. A esti taller averáronse alumnes  y alumnos de dellos conceyos como Grau, Les Regueres, Villaviciosa o Xixón.

El oxetivu d’esti alcuentru foi recuperar trabayos que tan perdiéndose porque la mayoría de la xente que facía esta xera ta dexándonos. Asina ye que pa l’asociación ye fundamental recuperar la tresmisión d’esti conocimientu ya espardelu. El taller, que tuvo dividíu en dos xornaes, contó con llana de merina ecolóxica procedente d’Extremadura. Los asistentes pudieron escoyer ente llana blanco, pardo o pinto.

Les medies yeren una prenda que solo podíen permitise unos pocos; yera un artículu pa xente pudiente. Dalgunos probes teníen que calzar la madreña ente paya ya otros gastaben les empeinas o empeas, tires de texíu de llana que diben cruzando pela pierna del empeine a la rodía. Yera una manera d’envolver les piernes pa tornar el frío. Nel conceyu d’Ayer tamién les había de piel y llamábense currines. Anguaño ye bien difícil topar prendes testigu de va más d’un sieglu por mor del clima húmedu del territoriu. 

La Flor ya ta rematando’l diseñu d’otros talleres que van ver la lluz próximamente pa tola xente que quiera averase.