Por Jaime Santos

Cuando se sofita la oficialidá del asturianu ye común argumentar la perda de derechos del asturfalante. Como asturfalante, y como asturianu, sinceramente, toi mucho más esmolecíu por otros de los mios derechos.

Por entamar: la llibertá d’opinión, la movilidad, la vivienda; el derechu al trabayu bien pagáu y estable, el derechu al llibre emprendimientu, el derechu a la salú, a la información llibre o el derechu a la vida son cada vez más precarios.

Unos y otros tamos confinaos, restrinxíos, vixilaos, empobrecíos. Impunxéronse protocolos como formes de vida que frañen la salú mental de la sociedá. Munchos padres tuvimos que defender el derechu a respirar de los nuestros fíos. Aplicáronse normes marcianes. Medíes inédites, universales y esperimentales. Dalgunos optaron pol exiliu. Otros mordieron la llingua por nun ver peligrar el sueldu. “Tamos faciendo un sacrificiu pa salvar a los güelitos”, decíen les cartes escolares, pero nun llegamos a tiempu pa rescatalos de los asilos onde los teníemos encerráos.

Una parte nin pequeña nin silenciosa de la sociedá nun traga más col relatu, pero a la vez ta farta de vivir cabreada, que eso tamién enferma.

Tenlo claro: la política nun te representa a ti, representa a otros. Asume que yes un esclavu y desobedez tolo que puedas. Non, nun queremos volver a una vida anterior, queremos una vida superior. Agora queremos más. Más amor, más roce, más güerta, más familia, más Dios y, sobre too, más llibertá y más soberanía.

La llucha tien campos muncho más perentorios. Volvei cola vuestra xente, a casa, atendei la quintana y llenaila de frutos.