Grau ya Candamu celebranon el Día Internacional de la Llingua Materna

Nas escueles Bernardo Gurdiel y Prieto Bances ficiéronse actividaes conmemoratives

Redaición/Grau

Los conceyos de Grau ya Candamu celebranon el Día Internacional de la Llingua Materna con dellos actos públicos y dellas acciones encaminadas a fomentar l’usu del asturianu, la llingua propia de los dos conceyos.

El Día Internacional de la Llingua Materna celébrase tolos años el 21 de febreiru en tol mundu pa concienciar sobre la diversidá llingüística ya cultural ya’l multillingüismu. El Día Internacional de la Llingua Materna lleva celebrándose dende febreiru de 2000 ya la fecha recuerda un día de 1952 cuando los estudiantes de Dhaka, l’actual Bangladex, taban manifestándose pola reconocencia de la sou llingua, el bengalín, frente al gobiernu del Pakistán d’entós ya fonon asesinaos pola policía pola subversión qu’implicaba la reconocencia política d’una llingua minorizada.

La celebración en Grau empezó’l día 20 de febreiru a las 18:00, cuando en Plenu del Conceyu aprobóse con 9 votos a favor ya 3 abstenciones la moción d’apoyu a la oficialidá del asturianu. Esta moción foi presentada pol grupu municipal d’Izquierda Unida ya tuvo apoyada pol PSOE local.

Tamién nel conceyu de Grau, el día 21, na escuela CP Bernardo Gurdiel, se fixo un actu a la hora del recréu au se lleéu una declaración que fixenon los propios escolinos sobre’l Día Internacional de la Llingua Materna. Nesti actu tuvienon tolos neños ya neñas del centru ya rematóu con una gran ovación pa los alumnos que falaron nas sous llinguas maternas: asturianu, castellanu, griegu, francés, inglés, rumanu, árabe ya ucranianu.

En Candamu, la celebración na escuela Prieto Bances foi tamién a la hora del recréu ya consistíu na presentación por parte del Técnicu del Serviciu de Normalización Llingüística, Miguel Rodríguez Monteavaro, ya’l Conceyal de Cultura, José Luis Suárez Arias, d’El llibru pa lo más pequeñín de la casa. Esti llibru que se publica agora en Candamu yá foi publicáu por outros conceyos como Grau, L.lena, Xixón, Cangas del Narcea ya dellos más ya yá un cuadernu pa que los padres ya madres vayan apuntando la evolución del fíu ou la fía nos sous primeiros años de vida. Esti llibru va poder consiguise na Casa del Conceyu cuando los proxenitores inscriban nel padrón a los recién nacíos.

Tolos actos d’esti Día Internacional de la Llingua Materna que se fixeron ente Grau ya Candamu son una muestra de cómo estos dos conceyos apuestan pola normalización social del asturianu como elementu de cohesión social ya nunca d’enfrentamientu.