En reconocencia a Xosé Ambás
Plácido Rodríguez
Ocurre n’ocasiones cuando pola capacidá de trabayu ya inercia creativa que xeneran dellas personas cercanas creémosnos nel drechu d’esixí-yos más de la cuenta.
Polo xeneral pasa colas madres; en Grau con Xosé Ambás, que dalguna manera tamién yá como la madre que curia ya da de mamar a la cultura tradicional n’Asturias ya en particular la del nuesu conceyu. Pongo como exemplu dalgunas de las actividaes nas que participóu nel mes d’avientu.
Acabante llegar d’impartir unos talleres, nada menos que n’Etiopía, fixo que esfrutáramos abondo na Casa Cultura cola presentación d’un llibru de rellatos que lleva por títulu “Llume”. Pouco a pouco foi desvelando los secretos de las ferramientas que dienon pie a la creación de los testos, interpretando a un escribán que nos cautivóu colas sos descripciones ya cantares, colas sos conocencias ya la manera de tresmitillas, cola so implicación ya ellaborada puesta n’escena.
Al outru día, participóu, xunto con Ramsés Ilesies, tocando, cantando ya baillando na Seronda en Danza que se fixo nel polideportivu del IES César Rodríguez.
Tamién yá pieza clave na mazcarada d’iviernu que se fai polos pueblos de la parroquia de San Xuan de Villapañada, “Los Aguilandeiros” una tradición que tuvo munchas décadas escaecida hasta que n’una de las sos entrevistas empezóu a tirar del filu pa consiguir la información necesaria ya faer copia de las alcordanzas de la xente vieyo que tovía s’alcordaba de cuando yeran neños.
Pero nun queda eiquí la cousa, porque a lo postrero d’esti mes vuelve ser l’alma mater de “Los Sones de la Navidá” un conciertu nel que participan una montonera de grupos de toa Asturias, interpretando temas navidiegos, volviendo a poner a Grau nel centru de la música ya la cultura tradicional de la nuesa rexón. Ya mentanto siguen él ya Ramsés arrexuntando información, sacando programas na Televisión Autonómica, ya ente tou esi traxín siempre saca un poucu tiempu pa falar con tol mundu ya interesase por él, por ella, pola salú de los mayores, ensin escaecésenos que trabaya a turnos nel HUCA.
Yá pola mor de too eso yá polo qu’intento escribir esti artículu a la manera de falar de Salcéu, el territoriu d’au son los míos antepasaos, d’au son tamién los d’Ambás. Entós yá cuando m’entrugo… si nun-y taremos esixendo más de la cuenta.
