L’alumnáu de Grau y Candamu celebra’l Día de la Llingua Materna

300 neños y neñes de los centros educativos de Primaria, Secundaria y Bachilleratu de los conceyos van celebralo xuntos

Colegio Prieto Bances, de Grullos, uno de los que participa en la actividad

Redacción/ Grau

El 21 de febreru conmemórase’l día internacional de la Llingua Materna, y l’alumnáu d’Asturianu de los centros educativos de Primaria, Secundaria y Bachilleratu de los Conceyos de Grau y Candamu van celebralo xuntos. Va ser un día de fiesta, con actividaes pa toles edaes, xuegos, talleres, visites culturales, y muncho más, nes que van participar más de 300 neños y neñes. L’actividá ta organizada pol Serviciu de Normalización Llingüística del Ayuntamientu en collaboración colos y les profesores de Llingua y Lliteratura Asturiana del Colexu Prieto Bances (Grullos), Colexu Virgen del Fresno y Bernardo Gurdiel (Grau) y los institutos de educación secundaria y bachillerato Ramón Areces y César Rodríguez. Col lema “Educación multillingüe: un pegollu del deprendimientu interxeneracional”, celébrase esti día proclamáu pola UNESCO y adoptáu poles Naciones Xuníes, que sorraya’l papel de les llingües p’afalagar la inclusión dientro de los Oxetivos de Desendolcu Sostenible.